АК ЧӘЧӘКЛӘР
Айгөл Әхмәтгалиева шигыре
Вил Усманов көе
Ак чәчәкләр...
Ап-ак язлар микән,
Ак өметләр микән күзләрдә?
Ак өметләр, аклык күзләп үткән
Гомер үзе нинди төсләрдә?
Кушымта:
Ак гөлләрдән җан җылысы алып,
Йөрәкләргә саласы иде,
Ак чәчәкләр кебек ап-ак булып,
Саф күңелле каласы иде.
Яшәү дигән татлы сүзгә сыйган
Тел ачкычы кайда күмелә?
Таң күзеннән гүя безнең гомер
Чык тамчысы булып түгелә.
Кушымта.
Гомер таҗы. Көздә ачы җилләр,
Җаннар елый шулчак, нишләргә?
Ак чәчәкләр йолдыз булып яна
Өмет нуры сүнгән кичләрдә.
Кушымта (2).
Ак чәчәкләр кебек ап-ак булып,
Саф күңелле каласы иде,
Саф күңелле каласы иде.
AQ ÇÄÇÄKLÄR
Aygöl Äxmätğälieva şiğere
Vil Usmanov köye
Aq çäçäklär...
Ap-aq yazlar mikän,
Aq ömetlär mikän küzlärdä?
Aq ömetlär, aqlıq küzläp ütkän
Ğömer üze nindi töslärdä?
Quşımta:
Aq göllärdän can cılısı alıp,
Yöräklärgä salası ide,
Aq çäçäklär kebek ap-aq bulıp,
Saf küñelle qalası ide.
Yaşäw digän tatlı süzgä sıyğan
Tel açqıçı qayda kümelä?
Tañ küzennän güyä bezneñ ğömer
Çıq tamçısı bulıp tügelä.
Quşımta.
Ğomer tacı. Közdä açı cillär,
Cannar yılıy, şulçaq nişlärgä?
Aq çäçäklär yoldız bulıp yana
Ömet nurı süngän kiçlärdä.
Quşımta (2).
Aq çäçäklär kebek ap-aq bulıp,
Saf küñelle qalası ide,
Saf küñelle qalası ide...
Мәшһүр татар язучысы Габдрахман Әпсәләмовның "Ак чәчәкләр" романын телевизия сериалы итеп төшергәндә язылган җыр.