- Other language - Audio Request

4
1 San Yésus né tulyaina i Fairenen amba mir i erumë, ne i Arauco pollë sahta se. 2 Úmes matë cantacainen auressen ar cantacainen lómissen, ar apa lúmë sina nes maita. 3 Ar i Sahtando tullë senna ar equë: "Ai elyë Eruo yondo ná, queta sinë sardinnar: Na massar!" 4 Mal nangwesiessë eques: "Ná técina: Atan umë cuina er massanen, mal ilya quettanen ya tulë Eruo antollo."
5 San i Arauco se-tulunë i airë ostonna ar se-panyanë i cordo telmassë. 6 Eques senna: "Ai elyë Eruo yondo ná, á horta immo undu, an ná técina: Canuvas valaryain pa le, ar coluvantel mantassen, ne talelya úva petë sardenna." 7 Equë Yésus: "Ata ná técina: Áva tyasta i Heru Ainolya!"
8 Ata i Arauco se-tulunë úsanyavë tára orontenna, ar tannë sen ilyë i aranier cemeno ar alcarenta. 9 Ar quentes senna: "Ilyë nati sinë antuvan elyen ai lantalyë undu cávala ninna." 10 San Yésus quentë senna: "Heca, Sátan! An ná técina: I Heru Ainolyanna cavuvalyë, ar er se veuyuvalyë." 11 San i Arauco oantë sello, ar en! valar tuller ar veuyaner se.
12 Apa hlarië ne Yohannes né panyaina mandossë, ambes mir Alílëa. 13 Oantes Násaretello ar tullë ar marnë Capernaumessë ara ëar, Sevulundo ar Naftalio ménassen, 14 amaquatien ya né quétina ter Isaia i Erutercáno, quétala: 15 "A nórë Sevulundo ar Naftalio, i ëarmallë Yordan pella, Alílëa i nórion! 16 I lië hámala morniessë cennë alta cala, ar in hamner nuruhuinëo ménassë cala ortanë." 17 Lúmë yanallo nyardanes ar quentë: "Piral, an menelo aranië utúlië harë!"
18 Vantala ara Eär Alílëo cennes atta hánor, Símon ye ná estaina Péter ar Andréas hánorya, hortala rembë mir i ëar, an nentë halamor. 19 Ar quentes tienna: "Tula, á hilya nye, ar caruvanyel halamor atanion." 20 Imyalussë ambentë rembentar ar se-hilyaner. 21 Lelyala entallo cennes yando atta exi i ner hánor, Yácov Severaion ar Yohannes hánorya, i luntessë as Severai atarenta, envinyatála rembentar, ar yalles te. 22 Imyalussë ambentë i luntë ar atarenta ar hilyaner se.
23 Ar lendes ter quanda Alílëa, saitala yomencoantassen ar nyardala i evandilyon pa i aranië ar nestala ilya hlívë ar ilya caimassë imíca i lië. 24 Ar i nyarië pa se lendë mir quanda Síria, ar tulunentë senna ilyë engwar, nwalyainë hlívínen ar nwalmínen rimbë nostaleron: raucoharyainar ar isillaiwar ar taptar, ar nestaneryet. 25 Ar altë sangar se-hilyaner, ho Alílëa ar i Cainenostor ar Yerúsalem ar Yúrëa, ar i nórello Yordan pella.