Psst...

Do you want to get language learning tips and resources every week or two? Join our mailing list to receive new ways to improve your language learning in your inbox!

Join the list

Chinese - Cantonese Audio Request

isenriver
1343 Characters / 0 Recordings / 0 Comments
Note to recorder:

大家好!呢篇文章係來自一個粵語雜誌叫做「迴響」唔好意思要麻煩你錄咁長嘅嘢,但係我其實唔需要你錄音錄得好嚴格,如果你講咗多嘢,或者講錯咗,要重新再講過一個字或一句句子,你都唔需要返轉頭再錄過,可以繼續講,一次錄嗮佢,跟住我以後會做一啲剪接,整理好佢。我建議用Audacity或者類似嘅APP做錄音係穩陣啲同埋方便啲。如果你可以自然講同埋用正常嘅語速,我就會好滿意啦
多謝你嘅幫助!

終於寫咗十期〈粵語新知〉喇!呢欄涵蓋咗好多層面嘅課題,有歷史、語音、詞法、句法、語用、書寫標準、語言習得、語言規劃,算係乜都講過吓。外行人眼中,我可能算係粵語語言學嘅專家,但係我其實係有限公司,以上課題入面我只係「入門級水平」,有時都係蜻蜓點水式,以一個「識多少少嘅內行人」去介紹返啲基本知識,亦即係所謂嘅「科普」。

「科普」係一件好有意義嘅事嚟。每日有成千上萬嘅研究人員發挖新嘅知識,總要有人整理出嚟。基本上我喺度寫嘅都係其他人嘅研究,靠整理學者嘅文章得出,整理完再換個角度寫出嚟。每次落筆,我都會諗:「如果呢個課題,係某某學者出手就好喇。」世上冇一個人係識得晒呢度嘅嘢,有時一條簡單問題,已經可以用上一個學者用十年八年嘅時間。語言嘅現象就係噉,大家日日都用,好容易以為自己係專家,會以為語言背後嘅原理都同樣咁簡單咁直觀。就好似大家日日都行路,都未必知道每條肌肉點樣運作,未必知道生物同物理嘅機制。有啲「阿媽係女人」嘅現象,整理起上嚟唔係咁簡單。要將呢啲「背後原理」講出嚟,好費神,但係好有意義:唔係求大家都變晒科學家,而係等想提升大家對現象嘅意識,理解返個問題有幾複雜,用一個鞏固啲嘅基礎去欣賞粵語,亦都等提升返「免疫力」。

我深知講呢啲課題唔可以懶高深,同時又明白唔夠深入,大家又唔會欣賞到個現象。舉個例,幾個月前我哋講「量名結構」,出發點其實係圍繞一個問題:「點解粵語講『本書』就得,唔可以講『呢書』『嗰書』,但係普通話可以講『這書』『那書』唔可以講『本書』?」一般人嘅思考方式可能就係「唓,唔同講法咪唔同講法,有幾奇?」由睇古文嘅人去睇呢?可能由引經據典揾出一堆古書嘅用例。但係呢啲唔係語言學嘅思考方式,因為呢啲唔係單純「事實問題」,唔係年紀夠大就會知,亦唔係咁啱睇過某一本古書天書就會知。語言學嘅問題,形式理論嘅需要透過數理嘅論證,亦有實證嘅問題需要透過科學方法嘅發掘。究竟兩隻語言結構上有冇分別呢?人類語言嘅處理機制點解容許兩種唔同嘅結構存在呢?細路仔點解會學得識咁複雜嘅構造呢?要理解呢種語言學問題,係要「知其然」,再「知其所以然」。當探討嘅嘢由「知道某個事實」呢種記誦式嘅要求,提升到「揾出現象原因」,就會需要好闊嘅知識基礎。唔係話啲嘢難定易,而係層次唔同咗,唔再係睇熟咗書就可以自稱專家。

講到咁深,點有可能一個人識晒咁多樣嘢?正正係冇可能,所以每個行業嘅「科普」,都需要一定嘅勇氣。明知自己唔係最叻嗰個,都要厚住面皮出嚟解答問題。點解我要喺一班著作等身嘅前輩面前班門弄斧,每月交稿呢?我冇稿費收㗎喎!(按:係我自己唔要,你哋投稿係有稿費㗎!)但係語言呢個課題,我哋唔出嚟,一樣會有一班小丑衝出嚟講。過往十幾年,真係阿豬阿狗都會出書講語言,論政嘅有、寫小說嘅有、搞風水嘅都有,佢哋有時喺篇文入面括住幾個英文詞就呃到人。

語言學嘅本科生企出嚟,對語言學嘅認識都好過呢班「磚家」。就算唔係某個課題嘅專家,語言學嘅訓練係幫到我哋區分邊啲係人邊啲係鬼,係有責任去推廣啲正確嘅語言學知識。喺一眾販賣無知嘅 KOL 包圍之下,無論你係博士生碩士生定本科生都好,都要一定要勇敢企出嚟對抗啲乜師物師嘅 fake news。過程入面,有我呢個學術世界嘅入門級研究員陪你,你哋唔會孤單。

Recordings

No Recordings yet

Comments

Overview

You can use our built-in RhinoRecorder to record from within your browser, or you may also use the form to upload an audio file for this Audio Request.

Don't have audio recording software? We recommend Audacity. It's free and easy to use.