SİNDER TATAR KEŞESE
Bolğarında bolğanğan,
Suwarında sızlanğan.
Sarayında sarğayğan —
Sinder, tatar keşese.
Sebergä seberelgän,
Çiläbedä çilängän,
Irımburda orılğan —
Sinder, tatar keşese.
Qazaqtağı qımızlar
Sineñ qannı qızdırtqan:
Qıtaydağı qıtlıqlar
Qaçaqlarıñ qırdırtqan.
Örgäneçtä örkegän,
Uralında uralğan,
Qasıymında qısılğan
Tatar keşese, tatar keşese.
İstanbulda ıslanıp,
Üzbäklärdä üzgärep,
Qırımnarda qırılıp
Betteñ, tatar keşese.
Frantsuzğa yaw çaptıñ,
Germanğa da yaw çaptıñ,
Ul illärdä ni taptıñ —
Yawğir tatar keşese?
Rudasın da sin çaptıñ,
Kümeren dä sin çaptıñ,
Balığın da sin tottıñ,
Neften dä taptıñ.
Kievta bar üz köyeñ,
Baltıyğında balqıysıñ,
Çit cirdä tuğan köyne,
Telne saqlıysıñ,
Tatar keşese!
Yapon häm Fin ilendä –
Barında da kilmeşäk,
Küçemsäk häm yöremsäk
Buldıñ, tatar keşese.
Bolay qañğırıp yörmä,
Qayt sin tuğan ileñä,
Baş quy Bolğar cirenä,
Äydä, tatar keşese.